Cadarnhawyd yr achos coronafeirws cyntaf yng Nghymru ym mis Chwefror 2020. Tair blynedd yn ddiweddarach ac yn sgil gostyngiad yn y nifer o ganlyniadau positif, rydym bellach mewn cyfnod a ystyrir yn gyfnod ‘covid sefydlog’. Fodd bynnag, ym mis Rhagfyr 2022 adroddodd tua 114,000 o bobl yng Nghymru symptomau COVID Hir, gyda 20% yn datgan bod y symptomau wedi cael effaith sylweddol ar eu bywydau bob dydd.
Cafodd y rhaglen Lles gyda WNO, a ddatblygwyd ochr yn ochr â gweithwyr proffesiynol y GIG, ei lansio ym mis Tachwedd 2021 gan Opera Cenedlaethol Cymru er mwyn cefnogi pobl sy’n byw gydag effeithiau hirdymor y feirws, megis straen, gorbryder a’r rhai sy’n fyr eu gwynt.
Gabby Curly, Cyfranogwr Lles gydag WNONewidiodd pob agwedd ar fy mywyd ar ôl COVID. Roedd tasgau dydd i ddydd yn cymryd mwy o amser i’w cwblhau gan fod angen i mi orffwys yn rheolaidd. Yn gorfforol, cefais ymarferion anadlu ymarferol o’r rhaglen Lles gyda WNO i leddfu tyndra yn y cyhyrau o amgylch fy asennau. Yn emosiynol, roedd y cymorth a gefais yn gwneud i mi sylweddoli nad oeddwn ar ben fy hun. Yn ystod y sesiynau, roedd fy ngofidiau’n diflannu ohona i a chefais bleser pur o gymryd rhan mewn canu. Mae'n ffordd wych o godi’r galon.
Ar ôl blwyddyn o ganfyddiadau gwerthuso hynod gadarnhaol, rydym yn falch o gyhoeddi y bydd y rhaglen canu ac anadlu hon, yn cael ei hehangu i ragor o Fyrddau Iechyd GIG Cymru yn 2023, gyda chefnogaeth Cyngor Celfyddydau Cymru drwy’r Gronfa Loteri Genedlaethol ar gyfer y Celfyddydau, Iechyd a Lles.
Dr Rachel Skippon, Arweinydd Seicoleg Gwasanaeth Covid Hir Gogledd CymruMae Lles gyda WNO wedi helpu i ymgorffori’r ymarferion anadlu a all leddfu symptomau COVID Hir, ac mae’r cymorth cyfoedion yn cyfrannu at y gwelliant cyffredinol mewn lles emosiynol. Mae’n wasanaeth hygyrch, ar gael i bobl yn rhithiol, sy’n helpu pobl sy’n methu mynychu sesiynau wyneb yn wyneb.
Hyd yma, mae dros 100 o gyfranogwyr wedi cwblhau’r rhaglen gyda 94% ohonynt yn adrodd bod y technegau anadlu’n effeithiol neu’n effeithiol iawn. Mae’r ymarferion anadlu a’r technegau lleisiol wedi hyrwyddo newidiadau cadarnhaol mewn patrymau anadlu, gan osgoi teimladau o banig drwy reoli’r anadl, cynyddu dealltwriaeth cyfranogwyr o’u system resbiradol ac annog gostyngiad yn y defnydd o feddyginiaeth ac oriau gwelyau mewn ysbytai. Mae’r rhaglen hefyd wedi cael effaith gymdeithasol, normaleiddio a seicolegol drwy’r teimladau o bleser pur a llawenydd sy’n cael eu creu yn ystod y sesiynau.
Cyfranogwr Lles gyda WNORwyf wedi cymryd rhan mewn amrywiaeth o raglenni adsefydlu COVID ers mis Mawrth 2020. Lles gyda WNO oedd yr orau a’r fwyaf effeithiol o bell ffordd. Yn ogystal â’m helpu i reoli fy anadlu a gweithio tuag at gryfhau fy llais a diaffram, roedd hefyd yn codi’r galon. Does dim llawer i wenu a chwerthin yn ei gylch o ran Covid Hir ond byddwn yn edrych ymlaen at y cyfarfod Zoom bob wythnos.
Am ragor o wybodaeth, cysylltwch â wellness@wno.org.uk