Fis Tachwedd hwn bydd Opera Cenedlaethol Cymru’n perfformio tri chyngerdd cerddorfaol sy’n ffurfio rhan o’r Gyfres Cyngherddau Rhyngwladol yn Neuadd Dewi Sant. Cyfarwyddwr Cerdd WNO, Tomáš Hanus, fydd yn arwain y cyngerdd hwn, a bydd dau unawdydd ardderchog yn ymuno ag ef: y sielydd ifanc o Armenia, Narek Hakhnazaryan a’r bariton o Slofacia, Gustáv Beláček.
Mae Tomáš yn dychwelyd i arwain Cerddorfa WNO mewn cyngerdd y mae cryn ddisgwyl amdano, sy’n serennu concerto sielo teimladwy a myfyriol Elgar yn ogystal ag agorawd William Tell, enwog Rossini, Sinfonietta, Janacek a ‘Forester’s Monologue’ o The Cunning Little Vixen.
Mae opera olaf Rossini, William Tell yn cynnwys cerddoriaeth sydd wedi cael ei defnyddio drosodd a throsodd mewn ffilmiau a rhaglenni teledu poblogaidd. Dyma’r opera olaf i Rossini ei chyfansoddi cyn iddo hanner-ymddeol, a berfformiwyd am y tro diwethaf gan WNO yn hydref 2014.
Mae Narek Hakhnazaryan yn ymuno â Cherddorfa WNO am y tro cyntaf i berfformio Concerto Sielo yn E leiaf, Elgar. Mae Narek wedi perfformio gyda sawl cerddorfa proffil uchel ledled y byd ac mae hefyd wedi ennill Gwobr Gyntaf a Medal Aur Sielo yng Nghystadleuaeth Ryngwladol Tchaikovsky XIV yn 2011 pan oedd yn 22 mlwydd oed. O 2014-2016 ymunodd â chynllun mawreddog Artistiaid y Genhedlaeth Newydd BBC, pan berfformiodd yn llwyddiannus am y tro cyntaf yn BBC Proms. Mae’r Concerto Sielo wedi dod yn un o weithiau mwyaf cofiadwy Elgar er gwaethaf methiant y perfformiad cyntaf o ganlyniad i ddiffyg ymarfer, bron i gant o flynyddoedd yn ôl. Mae cordiau cyntaf digalon, trawiadol y darn mor gyfarwydd. Wedi cael ei effeithio gan drychineb y Rhyfel Byd Cyntaf, cyfansoddodd Elgar y concerto fel myfyrdod, yn dilyn marwolaeth nifer o gerddorion, cyfansoddwyr a ffrindiau agos ato yn y rhyfel, sy’n cyferbynnu’n llwyr â’i Goncerto Feiolin cynharach. Ar ôl cael tynnu ei donsiliau, pan ddaeth Elgar ato’i hun gofynnodd am bensil a phapur a chyfansoddi beth rydym yn ei adnabod heddiw fel thema gyntaf y concerto sielo.
Mae ail ran y cyngerdd yn cynnwys dau o weithiau Janáček. Yn gyntaf bydd Gustáv Beláček yn perfformio’r ‘Forester’s Monologue’ o olygfa olaf The Cunning Little Vixen, sy’n cynnwys cerddoriaeth fwyaf addurnol a phrydferth yr opera. Mae Gustáv yn perfformio’n rheolaidd gyda cherddorfeydd Ffilharmonig Slofacia a Gweriniaeth Siec ac mae wedi gweithio gyda nifer o arweinwyr adnabyddus, yn eu plith Tomáš Hanus. Byddai Janáček yn aml yn cofnodi synau natur pan gerddai yng nghoedwig Morafia ger ei gartref a gellir clywed dylanwad natur ar yr opera.
Bydd y prynhawn yn gorffen gyda Sinfonietta epig, Janáček. Fe’i hysbrydolwyd i ysgrifennu’r ffanfferau ar ôl gwrando ar fand milwrol ac yn ddiweddarach gofynnodd Gŵyl Gymnasteg Sokol am gomisiwn ganddo, a dyma pryd y datblygodd y ffanfferau yn Sinfonietta.
Dywedodd Tomáš Hanus “Rwyf wedi gwirioni fy mod i’n gallu gwneud y cyngerdd hwn gyda’n Cerddorfa WNO anhygoel. I gerddorion sydd fwy aml na pheidio yn chwarae operâu, mae cyngerdd bob amser yn gyfle i siarad â’r gynulleidfa mewn iaith wahanol. Y tro hwn, mae’r iaith yn hynod unigryw, oherwydd mai Leoš Janáček ydyw. Mae ei gerddoriaeth mor wahanol i’r hyn a fyddai rhywun yn ei ddisgwyl, mae’n sefyll ar ei ben ei hun, yn ei safle gwreiddiol, bron nad yw’n perthyn i hanes.”
“Yn yr hanner cyntaf mae gennym Agorawd William Tell, Rossini, darn anhygoel o gerddoriaeth, yn ogystal â Choncerto Sielo Elgar, y gellir gwrando arno drosodd a throsodd, a bob tro byddwch yn clywedd rhywbeth newydd. Mae golygfa olaf ei opera, The Cunning Little Vixen, yn un o’r golygfeydd olaf mwyaf prydferth, dwys a barddonol yn y byd opera. Hoffwn wahodd yn gynnes ein cynulleidfa i rannu’r profiad unigryw hwn gyda ni, a gwrando ar ei Sinfonietta, lle mae’n defnyddio 12 trymped ymhlith offerynnau eraill.”
Yn dilyn y cyngerdd hwn, bydd Carlo Rizzi yn dychwelyd i arwain Cerddorfa WNO ar 27 Ionawr mewn cyngerdd sy’n cynnwys Agorawd Mendelssohn, The Hebrides (Fingal’s Cave), Scottish Fantasy, Bruch a Symffoni Rhif 2. cyffrous Rachmaninov. Bydd y feiolinydd o Rwsia, Alexander Sitkovetsky yn ymuno â’r gerddorfa, yn dilyn ei berfformiad o Goncerto Feiolin Mendelssohn yn gynharach eleni gydag WNO.
Am ragor o wybodaeth, ewch i wno.org.uk
Diwedd
Nodiadau i Olygyddion
- Opera Cenedlaethol Cymru yw'r cwmni opera cenedlaethol i Gymru gydag enw da yn rhyngwladol am ei ragoriaeth gerddorol. Wedi’i ariannu gan Gynghorau Celf Cymru a Lloegr, mae’r WNO yn cysylltu â phobl drwy gynnal perfformiadau wedi eu llwyfannu’n llawn o operâu a chyngherddau, yn ogystal â thrwy waith cymunedol ac addysgol a thrwy brosiectau digidol. Mae manylion llawn ar gael yn www.wno.org.uk
- Gellir lawrlwytho lluniau cynyrchiadau WNO yn www.wno.org.uk/press
- Am ragor o wybodaeth, lluniau neu gyfweliadau cysylltwch â Branwen Jones neu Penny James, Rheolwr y Wasg a Materion Cyhoeddus ar 02920 635038 neu branwen.jones@wno.org.uk / penny.james@wno.org.uk, Christina Blakeman, Swyddog y Wasg 02920 635037 neu christina.blakeman@wno.org.uk neu Elinor Lloyd, Cynorthwyydd Datblygu a Chyfathrebu ar 02920 635046 neu elinor.lloyd@wno.org.uk
- Cefnogir rôl Cyfarwyddwr Cerdd WNO gan Marian a Gordon Pell.