James Southall
Trosolwg
Arweinydd a phianydd yw James Southall, ac ar hyn o bryd ef yw Cyfarwyddwr Cerdd Ysgol Opera David Seligman yng Ngholeg Brenhinol Cerdd a Drama Cymru. Treuliodd bron i 15 mlynedd gydag WNO yn arwain amrywiaeth eang o gynyrchiadau, yn cynnwys Madam Butterfly, La traviata, Carmen, Don Giovanni, Die Fledermaus a The Barber of Seville. Yn ychwanegol at ei waith gydag WNO, mae James wedi arwain y Gerddorfa Ffilharmonig Frenhinol, English Touring Opera a Sinfonia Cymru. Hefyd, mae wedi gweithio gyda Thŷ Opera Brenhinol Covent Garden, Teatro Real Madrid a La Monnaie ym Mrwsel. Fel pianydd, mae James wedi perfformio mewn lleoliadau yn cynnwys Neuadd Wigmore a Neuadd Cadogan. Mae’n gyn-enillydd Gwobr y Cyfeilydd yng Ngwobrau Kathleen Ferrier a Chystadleuaeth Maggie Teyte ac mae wedi cydweithio gyda Syr Bryn Terfel, Elizabeth Watts ac Ailish Tynan. Astudiodd James yng Ngholeg Queens, Caergrawnt, lle’r oedd yn Ysgolhaig Organ, ac yn y Coleg Cerdd Brenhinol yn Llundain. Mae’n cyfuno ei yrfa fel perfformiwr gydag ymrwymiad i addysgu a mentora cerddorion ifanc.
Gwaith diweddar: Arweinydd Roberto Devereux, La traviata, Don Giovanni, Die Fledermaus, Le Vin herbé (WNO)
