Mae opera yn llawn cymeriadau eiconig. Yn aml, yr hyn sy'n gwneud i'r cymeriadau hyn fod hyd yn oed yn fwy disglair yw gwisg yr un mor eiconig. Felly, er anrhydedd i ddechrau Wythnos Ffasiwn Llundain, gadewch i ni edrych ar rai o wisgoedd mwyaf cofiadwy a deniadol WNO yn ystod y blynyddoedd diwethaf…
Emilia Marty (The Makropulos Affair, 2022)
Pa ffordd well o ddechrau nag gyda'r difa ddirgel Emilia Marty? Gwisgodd Emilia nifer o wisgoedd hudolus, wedi'u cynllunio gan Nicola Turner. Fodd bynnag, nid oes yr un yn fwy trawiadol na'i ffrog goch feiddgar, a feddiannodd ganol y llwyfan. Cafodd hon ei chydgysylltu â minlliw coch, wig goch a gemwaith aur a choch sylweddol. Roedd tâp magnetig hefyd yn rhedeg i lawr ochr y sgert, gan ganiatáu iddi gael ei thynnu'n llwyr, a datgelu ail sgert ddu oddi tani. Yn ystod y perfformiad, defnyddiodd Emilia y sgert uchaf fel clogyn matador mewn arddangosfa ffyrnig.
Don Giovanni (Don Giovanni, 2022)
Nesaf mae'r deniadol Don Giovanni. Chwaraeodd symbolaeth ran fawr yn y cynhyrchiad hwn, gyda Don Giovanni yn cynrychioli cannwyll a'r cymeriadau benywaidd yn cynrychioli gwyfynod yn cael eu denu at ei olau. Wedi'i ddylunio gan John Napier, roedd awgrym clyfar o’r rhain yn y gwisgoedd. Roedd Don Giovanni wedi'i wisgo bron yn gyfan gwbl mewn gwyn mewn gwisg afradlon yn cynnwys pedwar metr ar ddeg o ffabrig. Cafodd ei wasgod a'i epaulette addurnedig eu cynllunio i fod yn debyg i rai gwisg matador, gyda brodwaith aur yn cyfeirio at fflam y gannwyll.
Cio-Cio-San (Madam Butterfly, 2021)
Roedd ffrog binc Cio-Cio-San yn sicr o ddenu sylw. Nid yn unig yn brydferth, gyda haenau o diwl a netin mewn gwahanol arlliwiau o binc, ond roedd hefyd yn syfrdanol. Roedd blaen y ffrog yn llawer byrrach na'r cefn ac fe'i cynlluniwyd i gynrychioli fwlfa, oherwydd ei swydd fel putain. Wedi'i ddylunio gan Isabella Bywater, gwnaeth y ffrog hon ddatganiad ysgogol.
Sparafucile and Maddalena (Rigoletto, 2024)
Roedd rhaid cynnwys y brawd a'r chwaer Sparafucile a Maddalena milain ar ein rhestr hefyd. Mae gan y cymeriadau deimlad fampiraidd iddynt, ac adlewyrchwyd hyn yn eu gwisgoedd trawiadol, a ddyluniwyd gan Annemarie Woods. Roedd yr holl wisgoedd yn Rigoletto wedi'u hysbrydoli gan y cyfnod Elisabethaidd, felly gwisgodd Sparafucile lodrau llusern a choler, ynghyd â mantell laes, tra bod Maddalena yn gwisgo ffrog gyda choler Elisabethaidd draddodiadol wedi'i haddurno â gemwaith. Gwnaethpwyd y ddwy wisg o sidan ac roedd gwifren bigog wedi'i hargraffu arnynt i greu ymdeimlad o berygl.
Elisabetta (Roberto Devereux, 2019)
Mae ffrog goch Elisabetta yn un arall o'n hoff wisgoedd WNO. Wedi'i dylunio gan Madeleine Boyd yn seiliedig ar ffrog Vivienne Westwood, gwnaed y wisg o crepe de chine llifeiriol, wedi'i chynnal gan wregys lledr du. Gwisgodd Elisabetta sgert rhawn ffug o dan y ffrog, yn ogystal â menig wedi'u gwneud o fandiau o ddur di-staen a chadwyni. Hybodd yr ensemble trawiadol hwn ei chyflwyniad o'r frenhines ryfelgar.
Tosca (Tosca, 2025)
Yn olaf, mae gennym ein Tosca ddiweddaraf yn ei ffrog difa! Y Tymor hwn, mae gennym ddwy artist yn perfformio fel Tosca, Natalya Romaniw a Fiona Harrison-Wolfe. Felly, mae gennym ddwy ffrog, y ddwy wedi'u cynllunio gan Fotini Dimou. Mae gan ffrog Natalya gefn les, gyda secwinau a gleiniau, ynghyd â diamanté ar y blaen. Mae mwy o leiniau ar ffrog Fiona ac mae ychydig yn dywyllach o ran lliw. Fodd bynnag, mae'r ddwy yn disgleirio o dan sbotoleuadau, gan arddangos ceinder a hudoliaeth prif gymeriad yr opera.
Oes gennych chi hoff wisg WNO? Tagiwch ni ar y cyfryngau cymdeithasol a rhowch wybod i ni!