Yn ystod Tymor yr Hydref 2022 Opera Cenedlaethol Cymru, bydd Opera Ieuenctid WNO yn dychwelyd i’n cartref yng Nghanolfan Mileniwm Cymru i berfformio Cherry Town, Moscow, a elwir fel arall yn Cheryomushki, operata ddychanol gan y cyfansoddwr Dmitri Shostakovich. Wrth archwilio’r argyfwng tai yn rhanbarth Cheryomushki Moscow, ysgrifennodd y digrifwyr Sofietaidd blaenllaw’r cyfnod, Vladimir Mass a Mikhail Chervinsky y libreto, sydd wedi’i osod yn y 1950au.
Cheryomushki yw'r enw a roddir ar y bloc o fflatiau y mae'r stori'n canolbwyntio arno, adeilad preswyl newydd ei adeiladu y mae ein prif gymeriadau yn ceisio dod o hyd i gartref ynddo. Maent yn cael eu rhwystro gan fiwrocratiaid llwgr a rhaid iddynt ddod o hyd i ffyrdd dyfeisgar a chreadigol i ddod o hyd i gartref yn rhanbarth gorllewinol Moscow. Er bod y darn yn hwyliog a sardonig, mae cyfansoddiad Shostakovich yn cynnwys amrywiaeth eang o wahanol arddulliau cerddorol, yn dynwared cerddoriaeth Rwsiaidd glasurol yn ogystal â chyflwyno jazz a bale o fewn ei opera.
Mae’r stori’n dechrau gyda Sasha a’i wraig Masha, a Lidochka a’i thad Semyon, wrth iddynt deithio i Cheryomushki, rhanbarth ym Moscow lle mae’r fflatiau sydd newydd eu hadeiladu. Mae Sergei a Boris gyda nhw hefyd ac mae Boris yn cwympo mewn cariad gyda Lidochka yn gyflym, ond pan maent yn cyrraedd y fflatiau, nid yw Barbarashkin, rheolwr y stad yn fodlon rhoi’r allweddi iddynt ac mae’n gwrthod rhoi mynediad iddynt i nifer o’r fflatiau.
Ar ôl gweld na fyddant yn gallu cael mynediad i’w fflat trwy ddulliau confensiynol, mae Boris yn gyfrwys yn defnyddio’r craen adeiladu i godi Lidochka a’i thad trwy ffenestr y fflat newydd. Wrth iddynt ddechrau cartrefu, mae Barbarashkin yn rhuthro trwy dwll yn y wal, wedi’i ddilyn gan Drebyednyetsov, ac er bod y preswylwyr newydd yn cael eu taflu allan, mae bwriad y biwrocratiaid yn cael ei ddatgelu.
Mae Drebyednyetsov wedi neilltuo’r fflat i Vava, ei gariad, ei fwriad yw cyfuno’r ddau fflat yn anghyfreithlon er mwyn ei bodloni hi a sicrhau ei theyrngarwch. Ar ôl i’n harwyr ddarganfod y llygredd hwn, maent yn mynd i barti cynhesu’r aelwyd yn fflat Sasha a Masha, ac mae’r grŵp yn cytuno i drechu Drebyednyetsov a Barbarashkin a rhoi diwedd ar eu llygredd.
Ceisia Boris ddefnyddio cyfarfyddiad blaenorol gyda Vava trwy ei hudo hi pan mae’n gwybod y bydd Drebyednyetsov yn eu gweld nhw, a thrwy hynny tanseilio eu perthynas. Ond, mae ei awgrym cyfrwys yn cael ei wrthod gan y gweddill, ac yn lle hynny, maent yn mynd am ddatrysiad mwy dychmygol. Mae Liusia, gweithiwr adeiladu o Cheryomuski yn helpu ein harwyr trwy greu gardd hud, ac yn yr ardd mae yna fainc lle dim ond y gwir sy’n cael ei ddweud. Yn yr ardd hud, mae’r dihirod Drebyednyetsov a Barbarashkin yn cyfaddef eu troseddau ac yn cael eu trechu, ac mae ein harwyr yn mynd ymlaen i fyw bywyd hapus yn Cherry Town, Moscow.
Ymunwch â ni yng Nghanolfan Mileniwm Cymru ar ddydd Sul 9 Hydref, i weld ein harwyr yn trechu biwrocratiaeth a llygredd ac i glywed cyfansoddiad amlweddog Shostakovich.